Yin jóga og Bandvefslosun er nýtt námskeið í anda vinsælu Endurnærandi Pop-Up tímanna sem Hekla og Hildur hafa boðið upp á sl. árið.
Mýkt og mildi verður í fyrirrúmi í þessum tímum og munu þeir vera ýmist bandvefslosun, mjúkt jógaflæði eða yin jóga og allir tímar enda á ljúfri slökun.
Við ljúkum námskeiðinu með algjöru dekri fyrir taugakerfið og leiðum ykkur í gegnum liggjandi leidda hugleiðslu og djúpslökun með aðferðum jóga nidra.
Hekla mun sjá um bandvefslosunina og Hildur leiðir yin jóga og mjúkt jógaflæði.
Báðar aðferðir vinna vel á bandvefnum okkar sem mikilvægt er að mýkja til að viðhalda og auka liðleika og losa um stífleika í líkamanum.
Hekla og Hildur munu hafa mýktina og rónna að leiðarljósi og miðast tímarnir að því að iðkandinn finni vellíðunartilfinningu í lok tímans og gangi út úr tímunum endurnærður á líkama og sál.
Nánar um Bandvefslosun:
Í tímunum er bandvefur og vöðvar líkamans nuddaðir með mismunandi boltum.
Þú lærir að hlusta á líkamann og getur metið hversu mikinn þrýsting líkaminn þinn þolir. Við notum svo blöðrubolta til að minnka eða auka þrýsting eftir því sem við á. Í kjölfarið muntu finna fyrir aukinni líkamsvitund. Farið verður í bandvefsbrautirnar sem útskýra svo vel hvernig bandvefurinn tengir vöðva líkamans saman eftir ákveðnum leiðum. Fræðslan hjálpar okkur einnig að skilja betur upptök verkja því mjög oft eiga verkir upptök sín á öðrum stöðum en þar sem við finnum fyrir þeim.
Nánar um Yin jóga og mjúkt jógaflæði:
Í yin jóga er djúpum teygjum haldið í 2 til 5 mínútur. Notast er við kubba, púða og jógaólar til að styðja iðkandann inn í stöðunum þannig að hverjum og einum líði sem best en fái jafnframt djúpa teygju. Með iðkun yin jóga aukum við liðleika og almenna vellíðan á líkama og sál.
Í mjúku jógaflæði munum við gera góðar teygjur í meira flæði en í yin jóga. Stöðunum er ekki haldið eins lengi í einu en frekar farið úr einni teygju í aðra í eins konar flæði. Hér reynir minna á líkamlegan styrk en í venjulegu jógaflæði þar sem fókusinn er á að mýkja og lengja.